അഭിമുഖം
കെ.കെ ഫാത്വിമ സുഹ്റ / ഫൌസിയ ഷംസ്, ഖാസിദ കലാം
കേരള ചരിത്രത്തില്‍ തന്നെ പുതുമയേറിയതും ആദ്യത്തേതുമാണ്
2010 ജനുവരി 24-ന് ജമാഅത്തെ ഇസ്ലാമി കേരള ഘടകം കുറ്റിപ്പുറത്ത്
സംഘടിപ്പിക്കുന്ന വനിതാ സംസ്ഥാന സമ്മേളനം. സ്ത്രീകള്‍ സ്ത്രീകള്‍ക്ക്
വേണ്ടി നടത്തുന്ന സമ്മേളനം. സ്ത്രീകളുടെ അവകാശങ്ങള്‍ കവര്‍ന്നെടുത്ത്
അവരെ അധഃസ്ഥിതരാക്കി ഇരുട്ടില്‍ നിര്‍ത്തുന്ന പൌരോഹിത്യത്തിനും
തല്‍പരകക്ഷികള്‍ക്കുമെതിരെ നടക്കുന്ന ഏറ്റവും ശക്തമായ സമരപ്രഖ്യാപനം.
സമ്മേളനത്തിന്റെ മുഖ്യസംഘാടകരിലൊരാളും ജമാഅത്തെ ഇസ്ലാമി
സംസ്ഥാന സെക്രട്ടറിയുമായ കെ.കെ ഫാത്വിമ സുഹ്റ സമ്മേളന
ലക്ഷ്യങ്ങളും പരിപാടികളും വിശദീകരിക്കുന്നു
കേരളം ആദ്യമായി ഒരു വനിതാസമ്മേളനത്തിന് സാക്ഷ്യം വഹിക്കുകയാണല്ലോ? അതിന്റെ പ്രധാന സാരഥി എന്ന നിലക്ക് ഇങ്ങനെയൊരു സമ്മേളനത്തിന്റെ പ്രസക്തിയെക്കുറിച്ച്?
പെണ്ണിനെ പട്ടിന്റെയും പൊന്നിന്റെയും ലോകത്ത് തളച്ചിട്ട്, സ്ത്രീയെന്നാല്‍ ശരീരമാണെന്നും ശരീരമെന്നാല്‍ വെളുപ്പാണെന്നും ഉള്ള ഒരു മനോഭാവം സമൂഹം ഇന്ന് സ്ത്രീയുടെ ഉള്ളില്‍ രൂപപ്പെടുത്തിയിരിക്കുന്നു. അത് മാറണം. അവളുടെ യഥാര്‍ഥ പ്രകൃതിക്കും ചരിത്രം അവള്‍ക്ക് നല്‍കിയ സ്ഥാനങ്ങള്‍ക്കും യാതൊരു വിലയും കല്‍പ്പിക്കാത്ത വിധമാണ് സമൂഹം അവളോട് പെരുമാറുന്നത്. ആ അവസ്ഥയും തിരുത്തപ്പെടണം. അതിന് ഈ സമ്മേളനം വഴിവെക്കുമെന്നാണ് പ്രതീക്ഷ. സ്ത്രീശാക്തീകരണമാണ് സമ്മേളന ലക്ഷ്യം. കഴിവുള്ള സ്ത്രീകള്‍ ഇന്ന് ധാരാളമുണ്ട്. പക്ഷേ ആ കഴിവുകള്‍ ശരിയായ വിധം വിനിയോഗിക്കപ്പെടുന്നില്ല.
സ്ത്രീകളില്‍ പ്രകൃത്യാതന്നെ പല കഴിവുകളും സദ്ഗുണങ്ങളും നിലീനമാണ്. സ്നേഹം, കരുണ, സേവന മനഃസ്ഥിതി അങ്ങനെ പലതും. 'ക്ഷമയാം ധരിത്രി' എന്നല്ലേ സ്ത്രീയെപ്പറ്റി പറയുന്നത്. അത്തരം കഴിവുകള്‍ ഒന്നുകില്‍ തെറ്റായി ഉപയോഗിക്കപ്പെടുന്നു; അല്ലെങ്കില്‍ സ്ത്രീസമൂഹം തികച്ചും നിഷ്ക്രിയരായി ഒതുങ്ങിക്കൂടേണ്ട സാഹചര്യം സൃഷ്ടിക്കപ്പെടുന്നു. കുറച്ചുശതമാനം സ്ത്രീകള്‍ക്കേ തങ്ങളുടെ കഴിവ് പ്രകടിപ്പിക്കാന്‍ അവസരം ലഭിക്കുന്നുള്ളൂ. ബാക്കിയുള്ളവരുടെ കഴിവും യുവത്വവും വേണ്ടവിധം വിനിയോഗിക്കപ്പെടുന്നില്ല. ഈ കഴിവുകള്‍ വളര്‍ത്തിയെടുക്കാന്‍ അനുകൂല സാഹചര്യം ഉണ്ടാകണം. സ്ത്രീസമൂഹത്തിന്റെ പ്രകൃത്യാ ഉള്ള കഴിവും ശ്രമിച്ചാല്‍ ഉണ്ടാക്കിയെടുക്കാന്‍ പറ്റുന്ന കഴിവും കൂടി സമൂഹത്തിന് പ്രയോജനപ്പെടുത്തുക എന്നതാണ് സമ്മേളനലക്ഷ്യം.
സ്ത്രീകള്‍ക്ക് മാത്രമായി ഒരു സമ്മേളനം എന്ന ആശയം ആരുടെതാണ്?
ജമാഅത്തെ ഇസ്ലാമി ആന്ധ്രപ്രദേശ് ഘടകം ഹൈദരാബാദില്‍ വനിതകള്‍ക്ക് മാത്രമായി ഒരു സമ്മേളനം നടത്തിയിരുന്നു. അമ്പതിനായിരം പേരാണ് അന്നതില്‍ പങ്കെടുത്തത്. അതിന്റെ മൈക്ക് ഓപ്പറേറ്റര്‍ മുതല്‍ എല്ലാം സ്ത്രീകളായിരുന്നു. ജമാഅത്തെ ഇസ്ലാമി നന്നായി പ്രവര്‍ത്തിക്കുന്ന സംസ്ഥാനമാണ് ആന്ധ്ര. ആ സമ്മേളനം പ്രസ്ഥാനത്തിന് നല്ല ഇമേജുണ്ടാക്കി. മീഡിയയും വലിയ കവറേജ് നല്‍കി. കേരളത്തില്‍ നിന്നും പ്രതിനിധികളുണ്ടായിരുന്നു. മറ്റു സംസ്ഥാനങ്ങളില്‍ നിന്നുള്ള സ്ത്രീകളും പങ്കെടുത്തു. രണ്ടുവര്‍ഷം മുമ്പായിരുന്നു അത്. ആ സമ്മേളനമാണ് കേരളാ ജമാഅത്തിന് പ്രചോദനമായത്. അതിനുശേഷം അതിലും വലിയ ജനപങ്കാളിത്തത്തില്‍ ഒരു സമ്മേളനം നടത്തണമെന്ന് അന്നേ ആലോചിച്ചിരുന്നു.
കുറ്റിപ്പുറം സമ്മേളനത്തിന്റെ ആസൂത്രണം എങ്ങനെയാണ്?
സഹോദര സമുദായങ്ങളില്‍നിന്ന് ഉള്‍പ്പെടെ~ഒരു ലക്ഷത്തിലധികം സ്ത്രീകളെ പങ്കെടുപ്പിക്കാനാണ് ഉദ്ദേശിക്കുന്നത്. വിദേശ പ്രതിനിധികള്‍ പങ്കെടുക്കും. സഫാ നഗര്‍ എന്നാണ് സമ്മേളന നഗരിയുടെ പേര്. മാസങ്ങള്‍ നീണ്ടുനില്‍ക്കുന്ന പ്രചാരണ-ബോധവത്കരണ പരിപാടികളുടെ സമാപനം മാത്രമാണ് കുറ്റിപ്പുറത്ത് നടക്കുന്നത്. സമ്മേളന സന്ദേശം കേരളത്തിന്റെ മുക്കുമൂലകളില്‍ വരെ എത്തിക്കുക എന്നതാണ് പ്രധാനം. അതിന്റെ ഭാഗമായി ഒരുപാട് പരിപാടികള്‍ നാം ആസൂത്രണം ചെയ്യുന്നുണ്ട്. എറണാകുളം, ആലപ്പുഴ, കണ്ണൂര്‍, കോഴിക്കോട്, തൃശൂര്‍ ജില്ലകളില്‍ സെമിനാറുകള്‍ നടത്തും, വ്യാപകമായി ടേബിള്‍ ടോക്കുകള്‍ സംഘടിപ്പിക്കും, ഏരിയാതല പരിപാടികള്‍ വേറെയും. വീടുവീടാന്തരം കയറിയിറങ്ങി സ്ക്വാഡ് പ്രവര്‍ത്തനങ്ങള്‍ സംഘടിപ്പിക്കും.
ജനങ്ങളിലേക്ക് സമ്മേളന സന്ദേശം എത്തിക്കാന്‍ വീടുവീടാന്തരം കയറിയിറങ്ങുക എന്നതാണ് പ്രധാനമായും കണ്ടിട്ടുള്ളത്. കവല പൊതുയോഗങ്ങളില്‍ സ്ത്രീകള്‍ തന്നെയാവും പ്രസംഗിക്കുക. ഈദ് മീറ്റ്, കുട്ടികളെ പങ്കെടുപ്പിച്ച് വിളംബര ജാഥ എന്നിവയും സംഘടിപ്പിക്കും. സമൂഹത്തോടുള്ള ഉത്തരവാദിത്വങ്ങളെക്കുറിച്ച് സ്ത്രീകളെ ബോധവതികളാക്കുകയും അവരെ സമ്മേളനത്തില്‍ പങ്കെടുപ്പിക്കുകയുമാണ് ലക്ഷ്യം. യുദ്ധകാലാടിസ്ഥാനത്തില്‍ തന്നെ ഇനി മുന്നോട്ട് പോകേണ്ടിവരും. ഇനി രണ്ടു മാസമാണ് മുന്നിലുള്ളത്. എല്ലാവരും ഒന്നിച്ചിറങ്ങി പ്രവര്‍ത്തിക്കണം.
സമ്മേളനത്തിന്റെ തുടര്‍ച്ച, മറ്റു പ്രവര്‍ത്തനങ്ങള്‍?
തിരുവനന്തപുരം, കോഴിക്കോട്, കോട്ടയം മെഡിക്കല്‍ കോളേജുകളിലെ വനിതാ വാര്‍ഡുകള്‍ ഏറ്റെടുത്ത് നവീകരിക്കും. ജില്ലാ ആശുപത്രികളുടെ വാര്‍ഡുകള്‍ നവീകരിക്കാനും പദ്ധതിയുണ്ട്. നിരാലംബരായ ഏതാനും വിധവകളെ ദത്തെടുത്ത് സംരക്ഷിക്കാനും ഉദ്ദേശിക്കുന്നു. ദമ്പതികള്‍ക്കും ദമ്പതികളാവാന്‍ പോകുന്നവര്‍ക്കും കൌണ്‍സിലിംഗ് സെന്റര്‍ തുടങ്ങാനും ആലോചിക്കുന്നുണ്ട്. സമ്മേളനം നടക്കുന്ന മലപ്പുറം ജില്ലയിലെ നിര്‍ധനരായ ഏതാനും സ്ത്രീകള്‍ക്ക് തൊഴിലുപകരണങ്ങള്‍ നല്‍കും.
സമ്മേളനത്തിന് തുടര്‍ച്ച ഉണ്ടാവണമെന്ന് തന്നെയാണ് ആഗ്രഹിക്കുന്നത്. ശക്തമായ ബോധവത്കരണത്തിലൂടെ സമൂഹത്തില്‍ സ്ത്രീയുടെ സ്ഥാനമെന്താണെന്നും എന്തെല്ലാമാണ് അവളുടെ അവകാശങ്ങളെന്നും വ്യക്തമാക്കി കൊടുക്കണം. അതിന് രണ്ടുമാസത്തെ കാലയളവ് മതിയാകില്ല. തുടര്‍ പ്രവര്‍ത്തനങ്ങള്‍ ഉണ്ടായേ പറ്റൂ.
സമ്മേളന ചെലവുകള്‍?
സുമനസ്സുകളുടെ സഹായസഹകരണം മാത്രമാണ് ആകെയുള്ള മൂലധനം. നമ്മള്‍ ഏതൊരു സംരംഭവുമായി ഇറങ്ങിത്തിരിച്ചപ്പോഴും പൊതു സമൂഹത്തിന്റെ സഹായസഹകരണം ഇന്നുവരെ ഉണ്ടായിട്ടുണ്ട്.
സംസ്ഥാന സമ്മേളനത്തിന് എത്രത്തോളം സ്ത്രീ പങ്കാളിത്തം ഉറപ്പുവരുത്താനാവും?
കേരളത്തില്‍ ജമാഅത്തെ ഇസ്ലാമി വലിയൊരു നവോത്ഥാന പരിഷ്കരണ ദൌത്യമാണ് ഏറ്റെടുത്തത്. സ്ത്രീകളുടെ ഉന്നമനത്തിനും ജീവിതത്തിന്റെ സകല തുറകളിലും അവരുടെ പങ്കാളിത്തം ഉറപ്പു വരുത്തുന്നതിനും സംഘടന എന്നും ശ്രമിച്ചുപോന്നിട്ടുണ്ട്. ജമാഅത്തെ ഇസ്ലാമി കേരളത്തില്‍ അറുപതുകളില്‍ തന്നെ സ്ത്രീകള്‍ക്കായി കോളേജുകള്‍ ആരംഭിക്കുകയുണ്ടായി. ഇംഗ്ളീഷ്, അറബി, ഉര്‍ദു എന്നീ ഭാഷകളടക്കം എല്ലാ വിഷയങ്ങളും അവിടെ പഠിപ്പിച്ചിരുന്നു. കേരളത്തില്‍ പ്രസ്ഥാനം തുടക്കം കുറിച്ച മുഴുവന്‍ ഇസ്ലാമിയാ കോളേജുകളിലും പെണ്‍കുട്ടികള്‍ക്ക് ഉന്നത വിദ്യാഭ്യാസത്തിന് അവസരമുണ്ടായിരുന്നു. സ്ത്രീകള്‍ക്ക് ഖുര്‍ആനും ഹദീസിനുമൊപ്പം മുഖ്യധാരാ വിദ്യാഭ്യാസവും നല്‍കി. മുസ്ലിം സ്ത്രീകള്‍ക്ക് വിദ്യാഭ്യാസം വിലക്കപ്പെട്ടിരുന്ന ഒരുകാലത്താണ് ഈ പരിഷ്കരണ സംരംഭങ്ങള്‍. പൌരോഹിത്യം പല്ലും നഖവും ഉപയോഗിച്ച് ഇത്തരം സ്ത്രീശാക്തീകരണങ്ങളെ എതിര്‍ത്തു. പൌരോഹിത്യത്തിന്റെ കടുത്ത വിലക്കുകള്‍ മറികടന്ന് സ്ത്രീകള്‍ക്ക് പള്ളിയില്‍ പോകാനുള്ള അവസരമൊരുക്കി. മറ്റു സംസ്ഥാനങ്ങളില്‍ സ്ത്രീകള്‍ ഉയര്‍ന്നുവന്നിട്ടുണ്ടെങ്കിലും ഒരു സ്ത്രീ നേതൃനിര കേരളത്തിന് മാത്രം അവകാശപ്പെട്ടതാണ്.
ഇന്നും സ്ത്രീകള്‍ക്ക് നല്ല പങ്കാളിത്തമുണ്ട്. പുരുഷന്മാര്‍ നടത്തുന്ന പരിപാടികളില്‍ പോലും സ്ത്രീകളാണ് കൂടുതല്‍. ഖുര്‍ആന്‍ ക്ളാസിനൊക്കെ വീട്ടമ്മമാരുടെ നല്ലൊരു നിര തന്നെയുണ്ട്. ഏതു പരിപാടികള്‍ സംഘടിപ്പിച്ചാലും അറുപത് ശതമാനം സ്ത്രീകളാണ്. ഈ സംഘടിതശക്തിയെ ക്രിയാത്മകമായി പ്രയോജനപ്പെടുത്താന്‍ വേണ്ട തോതില്‍ കഴിഞ്ഞിട്ടില്ല. ചരിത്രപരമായ കാരണങ്ങള്‍ പലതും അതിനുണ്ട്. ഒരു കുതിച്ചു ചാട്ടമാണ് ഈ സമ്മേളനം ലക്ഷ്യമാക്കുന്നത്.
സ്ത്രീഉന്നമനത്തിന് വേണ്ടി ആദ്യമേ പ്രവര്‍ത്തിച്ച സംഘടനക്ക് ഒരു വനിതാ സമ്മേളനം നടത്താന്‍ 25 വര്‍ഷം കാത്തിരിക്കേണ്ടിവന്നത് എന്തുകൊണ്ട്?
സ്ത്രീകള്‍ക്ക് വേണ്ടി സ്ത്രീകള്‍ സംഘടിപ്പിക്കുന്ന സമ്മേളനം എന്നത് പുതിയൊരു ആശയമാണ്. അതേസമയം, ജമാഅത്തെ ഇസ്ലാമി ഇതുവരെ നടത്തിയ സമ്മേളനങ്ങളിലെല്ലാം സ്ത്രീകള്‍ ധാരാളമായി പങ്കെടുത്തിരുന്നുവെന്ന കാര്യം ഓര്‍ക്കണം. ദഅ്വത്ത്-ഹിറാ സമ്മേളനങ്ങളിലെ വര്‍ധിച്ച സ്ത്രീ പങ്കാളിത്തം ഉദാഹരണം. ഞാന്‍ ചെറിയ കുട്ടിയായിരുന്നപ്പോഴാണ് 1965ല്‍ ഒരു ജമാഅത്ത് സംസ്ഥാനസമ്മേളനം നടന്നത്. അതില്‍ ആസിയ ടീച്ചര്‍ പ്രസംഗിച്ചിട്ടുണ്ട്. അക്കാലത്ത് സ്ത്രീകള്‍ പ്രസംഗിക്കുക എന്നൊക്കെപ്പറഞ്ഞാല്‍ വലിയൊരു വിപ്ളവം തന്നെയാണ്. എത്രയോ സെമിനാറുകള്‍ സ്ത്രീകള്‍ ഒറ്റക്ക് പലഭാഗങ്ങളിലും നടത്തിയിട്ടുമുണ്ട്. ഇതൊക്കെ കാണിക്കുന്നത് ജമാഅത്തെ ഇസ്ലാമി എക്കാലവും സ്ത്രീകള്‍ക്കും തുല്യ പരിഗണനയും പ്രാധാന്യവും നല്‍കിപ്പോന്നിട്ടുണ്ട് എന്നാണ്.
ഇസ്ലാമിന്റെ ആദ്യ നൂറ്റാണ്ടുകള്‍ സ്ത്രീ ശാക്തീകരണത്തിന്റെ സുവര്‍ണ കാലമായിരുന്നല്ലോ? പിന്നീട് എന്തുപറ്റി? ഇസ്ലാമില്‍ ഇല്ലാത്ത പൌരോഹിത്യം അല്ലേ അതിന് കാരണം?
അതെ, ഇസ്ലാമിന്റെ സുവര്‍ണകാലത്ത് സ്ത്രീ സ്വതന്ത്രയായിരുന്നു. പിന്നീട് ഇസ്ലാം പല ദിക്കുകളിലേക്കും വ്യാപിച്ചപ്പോള്‍ അവിടങ്ങളിലുള്ള പല ആചാരങ്ങളും സംസ്കാരങ്ങളും മുസ്ലിംകളില്‍ കടന്നുകൂടി. ഇന്ത്യയിലും സംഭവിച്ചത് അതാണ്. ഇസ്ലാം ഇന്ത്യയില്‍ കടന്നുവരുമ്പോള്‍ സ്ത്രീകള്‍ അന്തഃപുരങ്ങളില്‍ കഴിഞ്ഞുകൂടുന്ന സമ്പ്രദായമാണ് നിലവിലുണ്ടായിരുന്നത്. അക്കാലത്തെ നോവലുകളും കഥകളുമൊക്കെ പുരുഷന്മാരെ വഞ്ചിക്കുന്നവരായാണ് സ്ത്രീകളെ ചിത്രീകരിച്ചത്. സ്ത്രീകള്‍ക്ക് സ്വാതന്ത്യ്രം നല്‍കിയാല്‍ അവര്‍ പുരുഷന്മാരെ വഞ്ചിക്കും എന്ന ധാരണ പ്രബലമായി. ഇതൊക്കെ ആസൂത്രിതമായിരുന്നു. സ്ത്രീകള്‍ 'വേലിചാടാതിരിക്കാന്‍' കെട്ടി ഉയര്‍ത്തിയ വിലക്കുകള്‍. അതിന്റെ സ്വാധീനം മുസ്ലിംകളിലും ഉണ്ടായി. പഠിച്ചാല്‍ കത്തെഴുതും എന്ന് പറഞ്ഞാണ് അവള്‍ക്ക് വിദ്യപോലും നിഷേധിച്ചത്. പിന്നെ അധഃപതനത്തിന്റെ പടുകുഴിയിലേക്കായിരുന്നു അവളുടെ വീഴ്ച.
ഇസ്ലാമിന്റെ ആദ്യനൂറ്റാണ്ടുകളില്‍ സ്ത്രീകള്‍ എല്ലാ രംഗത്തും സാന്നിധ്യമറിയിച്ചിരുന്നു- യുദ്ധരംഗത്ത്, പള്ളികളില്‍. മാര്‍ക്കറ്റിംഗ് രംഗത്ത് പോലും സ്ത്രീകളെ നിയമിക്കണമെങ്കില്‍ എത്രഉയര്‍ന്ന കാഴ്ചപ്പാട് വേണം. പടച്ചവന്‍ പറഞ്ഞത് അംഗീകരിക്കാന്‍ അവര്‍ മനസ്സുവെച്ചു. ഉമറി(റ)ന് സ്ത്രീകള്‍ രാവിലെ പള്ളിയില്‍ പോകുന്നതിനോട് യോജിപ്പില്ലായിരുന്നു. പക്ഷേ ഇസ്ലാം തടയുന്നില്ല. അപ്പോള്‍ അദ്ദേഹം അത് അനുവദിച്ചു. അക്കാലത്ത് പെണ്ണുങ്ങളോട് കയര്‍ത്തു സംസാരിക്കാന്‍ പോലും പേടിയായിരുന്നു. ആയത്ത് ഇറങ്ങുമോ എന്നായിരുന്നു ഭയം. സ്ത്രീകളുടെ അന്തസ്സിനും അഭിമാനത്തിനും എന്തെങ്കിലും ചെറിയ പ്രശ്നം വരുമ്പോള്‍ അല്ലാഹു ഇടപെട്ടിട്ടുണ്ട്. ആഇശ(റ)യുടെ കാര്യത്തിലും ഖൌല(റ)യുടെ കാര്യത്തിലും അവര്‍ക്ക് അനുകൂലമായി ഖുര്‍ആന്‍ വചനം ഇറങ്ങുകയായിരുന്നു. അഭിമാനം എല്ലാവരുടേതും ഒരുപോലെയാണ്. സ്ത്രീയെ അവഹേളിക്കാനോ അവളുടെ അഭിമാനം പിച്ചിച്ചീന്താനോ ഒരു പുരുഷനും അവകാശമില്ല. പ്രതിക്രിയയുടെ കാര്യത്തില്‍ പോലും ആണ്‍പെണ്‍ വ്യത്യാസം ഇസ്ലാമില്‍ ഇല്ല.
നിലവിലെ പൌരോഹിത്യ സമുദായഘടനയാണ് സ്ത്രീയുടെ അവകാശങ്ങള്‍ നിഷേധിക്കുന്നത്. പള്ളിപ്രവേശം പോലുള്ള കാര്യങ്ങള്‍ ഇതില്‍പെടും. ഇസ്ലാം അനുവദിച്ചുതന്ന കാര്യമാണ് ഇവിടെ പൌരോഹിത്യം തടഞ്ഞത്. പള്ളിനേര്‍ച്ചകള്‍ക്ക് പാതിരാവില്‍പോലും ആണ്‍പെണ്‍ വ്യത്യാസമില്ലാതെ ആളുകള്‍ കൂട്ടംകൂടും. അതിന് യാതൊരു പ്രശ്നവുമില്ല. അതേസമയം വളരെ സുരക്ഷിതയായി അല്ലാഹുവിന്റെ ഭവനത്തില്‍ പ്രാര്‍ഥനക്കായി സ്ത്രീ നട്ടുച്ചക്ക് പോയാല്‍ പോലും ഈ പുരോഹിത വൃന്ദം അപകടം, അപകടം എന്ന് പറഞ്ഞ് ഹാലിളകും. ഈ വൈരുധ്യങ്ങളെക്കുറിച്ച് സ്ത്രീകളെ ബോധവതികളാക്കണം.
സമ്മേളനം പുരുഷന്മാര്‍ക്ക് എതിരെയല്ല. പുരുഷന്മാരെ ഉള്‍പ്പെടുത്തിക്കൊണ്ട് തന്നെയാണ്. ഇസ്ലാമിന്റെ സ്വഭാവം അതാണ്. രണ്ടുകൂട്ടരും ഒന്നിച്ചാണ്. അതുകൊണ്ടാണ് പാലിക്കേണ്ട മുറകളും മറകളും പഠിപ്പിക്കപ്പെട്ടത്. സമൂഹത്തില്‍ ഇറങ്ങേണ്ടത് പെണ്ണ് മാത്രമാണെങ്കിലും പുരുഷന്‍ മാത്രമാണെങ്കിലും അത് വേണ്ടല്ലോ.
ഇസ്ലാമിന്റെ സുവര്‍ണയുഗം പുനഃസ്ഥാപിക്കാന്‍ ഇസ്ലാമിക പ്രസ്ഥാനത്തിന് എന്ത് ചെയ്യാന്‍ കഴിയും?
ലോകം ഇന്ന് ഇസ്ലാമിനെ പ്രതീക്ഷയോടെയാണ് കാണുന്നത്. ഈ നൂറ്റാണ്ട് ഇസ്ലാമിന്റെതാണ്. അതിന്റെ ശുഭ സൂചനകള്‍ കണ്ടുവരുന്നുണ്ട്. ഇത് പ്രസ്ഥാനത്തിന് നല്ല ബോധ്യവുമുണ്ട്. എവിടെയൊക്കെയാണ് അപാകതകള്‍ എന്ന് കണ്ടെത്തി അവ പരിഹരിക്കണം. ഇന്ന് മുസ്ലിം സ്ത്രീയെപ്പറ്റി ഒരുപാട് തെറ്റായ ധാരണകള്‍ സമൂഹത്തില്‍ പ്രചരിച്ചിട്ടുണ്ട്. അവ നീക്കി ഇസ്ലാമിലെ സ്ത്രീ ആരാണ് എന്ന് സമൂഹത്തെ ബോധ്യപ്പെടുത്തണം. സ്ത്രീക്ക് ഇസ്ലാമിലുള്ള സ്ഥാനം കൃത്യമായി നിര്‍ണയിക്കുകയാണ് സമ്മേളനത്തിന്റെ മുഖ്യലക്ഷ്യങ്ങളിലൊന്ന്. അവളുടെ അവകാശങ്ങളും ഉയര്‍ത്തിക്കാട്ടും. വികലമായ പലതരം സ്ത്രീവിമോചനാശയങ്ങള്‍ ഇന്ന് പ്രചാരത്തിലുണ്ട്. അവയുടെ പൊള്ളത്തരം തുറന്ന് കാട്ടാനും പ്രചാരണ പരിപാടികളില്‍ ഊന്നല്‍ നല്‍കും. ഇങ്ങനെ പൊതുസമൂഹത്തില്‍ ഇസ്ലാമിനെ സമ്പൂര്‍ണമായി പ്രതിനിധീകരിക്കാനായാല്‍ നമുക്ക് ആ സുവര്‍ണയുഗം തിരിച്ചുപിടിക്കാനാവും.
കുടുംബംവിട്ട് സ്ത്രീ പൊതുരംഗത്ത് ഇറങ്ങുന്നത് എത്രമാത്രം വിജയിക്കും?
വീട് വിട്ടെറിഞ്ഞ് സമൂഹത്തിലിറങ്ങണമെന്നല്ല പറയുന്നത്. സ്ത്രീയും പുരുഷനും ഒന്നിച്ച് പ്രവര്‍ത്തിക്കുകയാണ് വേണ്ടത്. സ്ത്രീയായാലും പുരുഷനായാലും പ്രഥമ ബാധ്യത കുടുംബത്തോടാണ്. അതിന് കോട്ടം തട്ടാതെയായിരിക്കണം സമൂഹ പുനര്‍നിര്‍മിതിക്ക് ഇറങ്ങേണ്ടത്. സ്ത്രീകള്‍ സമൂഹത്തിലിറങ്ങിയാല്‍ എന്തൊക്കെ സംഭവിക്കില്ല എന്നാണ് ചിലര്‍ക്ക് പേടി. കുടുംബത്തോടുള്ള ബാധ്യതകള്‍ നിര്‍വഹിച്ചാല്‍ തന്നെ ഒരുപാട് സമയം സ്ത്രീകള്‍ക്ക് ബാക്കിയുണ്ട്.
വീട്ടിലിരുന്ന് സമൂഹത്തിന് വേണ്ടി ഒരുപാട് കാര്യങ്ങള്‍ ചെയ്യാന്‍ കഴിയില്ലേ?
സ്ത്രീ വീട്ടില്‍ നിന്നിറങ്ങിയാല്‍ മോശക്കാരിയാകുമെന്ന തെറ്റായ ധാരണ നമ്മുടെ സമൂഹത്തിലുണ്ട്. വീട്ടകങ്ങളില്‍ വെറുതെ ഇരിക്കുന്ന സ്ത്രീ എന്താണു ചെയ്യുന്നത്? ടിവിയിലെ സിനിമ-സീരിയല്‍ ലോകത്താണ് അവള്‍. അവളുടെ മനസ്സ് നിരന്തരം മലിനമാക്കപ്പെടുകയാണ്. അവളിലൂടെയാണ് സാംസ്കാരികാധിനിവേശം കൂടുതലും നടക്കുന്നത്. ഇത് അപകടകരമാണ്. സ്ത്രീ കാലഘട്ടത്തെ മനസ്സിലാക്കി ഉദ്ബുദ്ധയാകുമ്പോഴാണ് ഏതൊരു സമൂഹവും രക്ഷപ്പെടുക.
കുടുംബത്തോടുള്ള ബാധ്യതകള്‍ നിര്‍വഹിച്ചു കൊണ്ടുതന്നെ പുരുഷന്‍ സാമൂഹികബാധ്യത നിറവേറ്റുന്നു. അപ്പോള്‍ കുടുംബബാധ്യത നിര്‍വഹിച്ച് ശേഷിച്ച സമയം സാമൂഹികസേവനത്തിനിറങ്ങുന്ന സ്ത്രീയുടെ കാര്യത്തില്‍ ഈ പേടി അനാവശ്യമാണ്. കാലഘട്ടം മോശമാകുമ്പോള്‍ സ്ത്രീകളെയാണ് അത് ബാധിക്കുന്നത്. അപ്പോള്‍ സ്ത്രീകള്‍ തന്നെയാണ് അതിനെതിരെ പ്രതികരിക്കേണ്ടതും മുന്നിട്ടിറങ്ങേണ്ടതും. എന്നാലേ യഥാര്‍ഥ സ്ത്രീമോചനം സാധ്യമാവൂ.
സമ്മേളനപ്രമേയം കുടുംബത്തെ ഉയര്‍ത്തിപ്പിടിക്കുന്നുണ്ടല്ലോ. കുടുംബ ശൈഥില്യത്തിന്റെ കാലമാണിത്. പൊരുത്തമില്ലാത്തവര്‍ തമ്മിലുള്ള ഒരു കുടുംബം. ഇതിനെ എങ്ങനെയാണ് ഉയര്‍ത്തിപ്പിടിക്കുന്നത്?
കുടുംബശൈഥില്യത്തിന് കാരണം ആശയപൊരുത്തം ഇല്ലായ്മയാണ്. ആദര്‍ശപ്പൊരുത്തമാണ് ആവശ്യം. ഇന്ന് കല്ല്യാണ മാര്‍ക്കറ്റില്‍ പണവും പൊന്നും പ്രശസ്തിയുമൊക്കെയാണ് കടന്നുവരുന്നത്. സ്ത്രീകള്‍ ബോധവത്കരിക്കപ്പെടുമ്പോള്‍ മാത്രമേ ഭര്‍ത്താവിനോടും കുട്ടികളോടും കുടുംബത്തോടുമുള്ള ബാധ്യത ശരിയാംവണ്ണം നിര്‍വഹിക്കാന്‍ അവര്‍ പ്രാപ്തരാവൂ. ഇന്ന് രണ്ടവസ്ഥയില്‍ നില്‍ക്കുന്ന സ്ത്രീകളെയാണ് കാണാനാവുക. സ്ത്രീയുടെ സ്വത്വമെന്തെന്ന് തന്നെ തിരിച്ചറിയാത്ത ഒരു വിഭാഗം. ആണിനെയോ അവന്റെ വ്യക്തിത്വത്തെയോ മാനിക്കാത്ത മറ്റൊരു വിഭാഗം. ഒന്നുകില്‍ കളരിക്കുപുറത്ത് അല്ലെങ്കില്‍ കുരിക്കളുടെ നെഞ്ചത്ത് എന്ന അവസ്ഥ. പുരുഷനെ എതിരിടണം എന്ന കാഴ്ചപ്പാട് ഞങ്ങള്‍ക്കില്ല. പുരുഷനും സ്ത്രീയും ഒന്നിച്ച് മുന്നോട്ട് നീങ്ങണം. ഈയൊരു കാഴ്ചപ്പാടോടെ മുന്നോട്ട് നീങ്ങുമ്പോഴേ യഥാര്‍ഥ മോചനം സാധ്യമാകൂ. സ്ത്രീവിമോചനം പറഞ്ഞ് എത്രയെത്ര പ്രസ്ഥാനങ്ങള്‍ പൊട്ടി മുളച്ചു! ഇന്നും സ്ത്രീ പീഡനഗ്രാഫ് കുത്തനെ തന്നെയാണ്. അന്താരാഷ്ട്ര വനിതാ സമ്മേളനം നടത്തി എന്താണ് ചര്‍ച്ച ചെയ്യുന്നത്? സ്ത്രീകള്‍ക്ക് ഫ്രീ സെക്സ് അനുവദിക്കണം! ഇതിന്റെയൊക്കെ പിന്നില്‍ പുരുഷന്മാരാണ്. സ്ത്രീകളെ എങ്ങനെ ദുരുപയോഗം ചെയ്യാം എന്ന കുറുക്കന്റെ കണ്ണാണ് അവര്‍ക്ക്. സ്ത്രീ വിമോചന പ്രസ്ഥാനങ്ങള്‍ക്ക് തന്നെ ദിശാബോധം നഷ്ടപ്പെട്ടിരിക്കുന്നു. സ്ത്രീവിമോചന പ്രസ്ഥാനങ്ങള്‍ക്ക് ദിശ നിര്‍ണയിക്കുക എന്നതാണ് സമ്മേളനലക്ഷ്യം.
മോചനം എന്നതുകൊണ്ട് എന്താണ് അര്‍ഥമാക്കുന്നത്?
എല്ലാനിലക്കും സ്ത്രീ ഇന്ന് അപകടം നേരിടുകയാണ്. ജീവിക്കാന്‍ മാത്രമല്ല, ജനിക്കാന്‍ തന്നെ സ്ത്രീക്ക് അവകാശമില്ല എന്നായിരിക്കുന്നു. ഷഹാന, സഫിയ, കൃഷ്ണപ്രിയ എത്ര കുരുന്നുജീവനുകളാണ് നമുക്ക് നഷ്ടപ്പെട്ടത്! പുരുഷന്‍ വേട്ടക്കാരനും സ്ത്രീ ഇരയും ആയി തുടര്‍ന്നുകൊണ്ടിരിക്കുന്നു. പെണ്ണിനെ കൂടപ്പിറപ്പായി കാണാനാണ് ഇസ്ലാം പഠിപ്പിച്ചത്. സ്വന്തം പിതാക്കന്മാരാലും സഹോദരന്മാരാലും അമ്മാവന്മാരാലും പെണ്‍കുട്ടികള്‍ പീഡിപ്പിക്കപ്പെടുന്നു. ഇതിനെതിരെ നാം സംഘടിക്കണം. നാം കുറച്ചൊക്കെ തന്റേടികളായാല്‍ പ്രശ്നം ഇത്ര രൂക്ഷമാവില്ല. ഒരു പെണ്‍കുട്ടിയുടെ മാനവും ജീവനും നഷ്ടപ്പെട്ടാല്‍ പ്രതികരിക്കുന്നത് ഏതെങ്കിലും സാമൂഹികപ്രവര്‍ത്തകന്‍ മാത്രമാണ്. പ്രതികരിക്കുന്ന സ്ത്രീയെ തന്റേടി എന്നു പറഞ്ഞ് ഒറ്റപ്പെടുത്തുന്നു. നമ്മുടെ അന്തസ്സ് ഉയര്‍ത്തിപ്പിടിക്കാനുള്ള കരുത്ത് സ്വയം ആര്‍ജിച്ചെടുക്കുമ്പോഴാണ് മോചനം സാധ്യമാകുന്നത്.
ഇത്തരം പ്രശ്നങ്ങളില്‍ ഒരു വനിതാ സംഘടന എന്ന നിലയില്‍ എത്രമാത്രം ഇടപെടലുകള്‍ ഉണ്ടാകുന്നുണ്ട്?
ജമാഅത്തെ ഇസ്ലാമി ഒരു പ്രതിജ്ഞ എടുത്തിട്ടുണ്ട്; ഇസ്ലാം സ്ത്രീകള്‍ക്ക് നല്‍കിയിട്ടുള്ള സ്ഥാനങ്ങളും പദവികളും അവര്‍ക്ക് നേടിക്കൊടുക്കുന്നതു വരെ ഈ സമരമുഖത്തുണ്ടാകും എന്ന്. ഇത്തരം പ്രശ്നങ്ങളില്‍ ഓരോ സ്ത്രീക്കും സമൂഹത്തില്‍ ആര്‍ജവത്തോടെ ഇടപെടാനുള്ള പരിശീലനമാണ് സമ്മേളനത്തിലൂടെ നല്‍കാന്‍ ശ്രമിക്കുന്നത്.
നമ്മളാണ് ദിശാബോധം നല്‍കേണ്ടവരെങ്കില്‍ എല്ലാ രംഗത്തും നാം മാതൃകയാവേണ്ടതില്ലേ? പഠിച്ച പെണ്‍കുട്ടികളുടെ സേവനം സമുദായത്തിന് മുതല്‍കൂട്ടാകാതെ പോകുന്നില്ലേ?
ശരിയാണ്. ഇന്ന് പ്ളസ്ടു ആണ് മാര്‍ക്കറ്റ് വാല്യു. അത് കഴിഞ്ഞാല്‍ വിവാഹത്തിന് വയസ്സ് പ്രശ്നമാകും. കുറച്ചുകാലം മുമ്പ് അതിനൊരു മാറ്റം ഉണ്ടായിരുന്നു. ഇപ്പോള്‍ കാര്യം വീണ്ടും അവതാളത്തിലായി. ഇക്കാര്യത്തിലൊക്കെ മാതൃക കാട്ടേണ്ടത് മുസ്ലിം സമുദായമാണ്. ഇസ്ലാം നല്‍കിയ സ്ഥാനമാനങ്ങള്‍ നമുക്ക് ലഭ്യമാവുമ്പോള്‍ പൊതുസമൂഹത്തില്‍ നാം സ്വീകാര്യരായിത്തീരും.
ഇന്നലെകളിലെ കാമ്പസുകള്‍ തിന്മകള്‍ക്കെതിരെ പ്രതികരിച്ചവരായിരുന്നു. ഇന്നവര്‍ നിഷ്ക്രിയരാണ്. വിദ്യാഭ്യാസം എന്തിന് നേടുന്നു എന്നാലോചിക്കുന്നില്ല. കുറെ സര്‍ട്ടിഫിക്കറ്റുകള്‍ തരപ്പെടുത്തി ജോലി നേടുക എന്നതിനപ്പുറം വിദ്യാഭ്യാസത്തിന് ലക്ഷ്യമില്ലെന്ന് വന്നിരിക്കുന്നു. അത് നിലവിലെ വിദ്യാഭ്യാസത്തിന്റെ കുഴപ്പമാണ്. യാഥാര്‍ഥത്തില്‍ വിദ്യാഭ്യാസത്തിന്റെ ലക്ഷ്യം ജോലി സമ്പാദനം മാത്രമല്ല. അതുകൊണ്ടാണ് വിദ്യാഭ്യാസം മൂല്യവത്താകണമെന്ന് പറയുന്നത്. ഇന്ന് നമ്മുടെ കുട്ടികള്‍ക്ക് ഹൈഡ്രജനും ഓക്സിജനും ചേര്‍ന്നാലാണ് വെള്ളമുണ്ടാകുന്നത് എന്നറിയാം. എന്നാല്‍ അടുത്തിരിക്കുന്ന ദാഹിക്കുന്ന കുട്ടിക്ക് വെള്ളം കൊടുക്കാനുള്ള അറിവ് ഇല്ല. അത്തരമൊരു വിദ്യാര്‍ഥി സമൂഹമാണ് ഇന്നുള്ളത്. കൊലപാതകങ്ങളിലും കള്ളക്കടത്തിലും പെണ്‍വാണിഭത്തിലും ഉള്‍പ്പെടുന്നത് ഡോക്ടര്‍മാരും എഞ്ചിനീയര്‍മാരും വക്കീലന്മാരും ഉള്‍പ്പെട്ട വിദ്യാസമ്പന്നരാണ്.
പഠിക്കാന്‍ ഇന്നേറെ മുന്നില്‍ പെണ്‍കുട്ടികളാണ്. അതിന്റെ ചെറിയൊരു മാറ്റം കാണാനുമുണ്ട്. പണ്ടൊക്കെ കല്ല്യാണസമയത്ത് മഹറായി എന്തെങ്കിലും കൊടുക്കും. അല്ലെങ്കില്‍ ഒരു മഹറ് പറയും. പിന്നെ കല്ല്യാണം കഴിഞ്ഞ് മഹറ് ലഭിച്ചില്ലെങ്കിലും സ്ത്രീ അത് പൊരുത്തപ്പെടും. എന്നാല്‍ പെണ്‍കുട്ടികള്‍ ഇന്ന് മഹറ് ചോദിച്ചുവാങ്ങുന്നുണ്ട്. സ്ത്രീധനം മോശമായ ഏര്‍പ്പാടാണെന്ന് എല്ലാവര്‍ക്കും അറിയാം. അതുകൊണ്ട് അത് തനിക്ക് വേണ്ടതില്ല എന്ന് വാശിപിടിക്കുന്ന പെണ്‍കുട്ടികളും ഏറെയാണ്. ഈ നിലക്ക് പല മാറ്റങ്ങളും കാണുന്നുണ്ട്. ഈ മാറ്റങ്ങളെ ത്വരിതപ്പെടുത്തുക എന്നതാണ് നമ്മുടെ ലക്ഷ്യം.
എന്നാലും ജോലിയുടെ കാര്യം വരുമ്പോള്‍ ടീച്ചിംഗ് മാത്രം പ്രഫഷനായി സ്വീകരിക്കുക എന്ന ഒരു അവസ്ഥ ഇന്നും മാറിയിട്ടില്ല. അതും പതുക്കെ മാറും. ക്രമബന്ധിതമായ വളര്‍ച്ചയാണ് ഉണ്ടാവേണ്ടത്. പെണ്‍കുട്ടികള്‍ എല്ലാ രംഗത്തും മാറും.
'സാമൂഹികവിപ്ളവത്തിന് സ്ത്രീശക്തി' എന്നത് സമുദായത്തിലെ മറ്റ് സംഘടനാ നേതൃത്വങ്ങളില്‍ നിന്ന് വിമര്‍ശനം ഉയരാന്‍ കാരണമാവില്ലേ?
നമ്മുടെ സാമൂഹികരംഗം മൂല്യച്യുതിയിലാണ്. വിദ്യാഭ്യാസരംഗത്തും ഭരണരംഗത്തും എല്ലാം മൂല്യത്തകര്‍ച്ചയാണ്. നഷ്ടപ്പെട്ട മൂല്യങ്ങള്‍ തിരിച്ചുപിടിക്കണം. അതാണ് സാമൂഹിക മാറ്റം. അല്ലാതെ സ്ത്രീകളൊയൊക്കെ പുറത്തിറക്കിക്കൊണ്ട് അടുക്കള ഒഴിവാക്കാനല്ല. അടുക്കളയില്‍ നിന്ന് മൂല്യങ്ങളുടെ അടിസ്ഥാനത്തില്‍ ഒരു മാറ്റം. അങ്ങനെ ഓരോ സ്ത്രീയും ശ്രമിച്ചാല്‍ നല്ല തലമുറ ഉണ്ടാകും. കമലാ സുറയ്യ ഒരിക്കല്‍ പറഞ്ഞു: 'എന്റെ മക്കളെക്കുറിച്ച് എനിക്ക് നല്ല ഉറപ്പാണ്. അവരൊരു സ്ത്രീയെയും ദ്രോഹിക്കില്ല. അവരൊരു സ്ത്രീയുടെയും അഭിമാനത്തിന് ക്ഷതം ഏല്‍പ്പിക്കുകയില്ല.' അങ്ങനെ ഓരോ സ്ത്രീക്കും തന്റെ മക്കളെ കുറിച്ച് പറയാന്‍ കഴിഞ്ഞാല്‍ സമൂഹം നന്നായി. ഈയൊരു അവസ്ഥയിലേക്ക് മാറണം. അതാണ് സാമൂഹിക വിപ്ളവത്തിന് സ്ത്രീശക്തി. അല്ലാതെ എല്ലാവരും ഭരണം കയ്യാളണം എന്നല്ല.
നിലവിലുള്ള വ്യവസ്ഥിതിയെ വെല്ലുവിളിച്ചുകൊണ്ടേ ആ ഒരവസ്ഥയിലേക്ക് എത്താന്‍ പറ്റുകയുള്ളൂ എന്നാണെങ്കില്‍ അങ്ങനെത്തന്നെ വേണം. ജമല്‍ യുദ്ധം നയിച്ചത് ആഇശ(റ) ആണ്. അവര്‍~~ഒട്ടകപ്പുറത്തിരുന്ന് പ്രസംഗിച്ചു. അതാണ് ചരിത്രം. സ്ത്രീക്ക് ഒരു സേവനമനസ്സുണ്ട്. അവള്‍ക്ക് ഒരുപാട് കാര്യങ്ങള്‍ ചെയ്യാന്‍ കഴിയും. സേവനം എന്നു പറഞ്ഞാല്‍ നമുക്കാകെ അറിയുന്നത് ഒരു മദര്‍തെരേസയെ ആണ്. അതുപോലെ ഇസ്ലാമില്‍ ഒരുപാട് പേര് ഉണ്ട്.
ഒരു മദര്‍തെരേസയെ സംഭാവന ചെയ്യാന്‍ ക്രിസ്ത്യാനിറ്റിക്ക് കഴിഞ്ഞു. പക്ഷേ സ്ത്രീക്ക് അര്‍ഹമായ സ്ഥാനം നല്‍കിയ ഇസ്ലാമിന് മദര്‍തെരേസമാരെ ഉണ്ടാക്കിയെടുക്കാന്‍ എന്തുകൊണ്ട് കഴിയുന്നില്ല?
ആരുപറഞ്ഞു ഇല്ലെന്ന്. ചരിത്രം യഥാവിധി വായിക്കപ്പെടാത്തതു കൊണ്ട് അവര്‍ അറിയപ്പെടുന്നില്ല എന്ന് മാത്രം. പ്രവാചക കാലഘട്ടത്തില്‍ ഒരുപാട് സ്ത്രീകള്‍ ഉണ്ടായിട്ടുണ്ട്. ഉദാഹരണത്തിന് ഉമ്മു അതിയ്യ. നഴ്സിംഗ് രംഗത്താണ് അവര്‍ പ്രവര്‍ത്തിച്ചത്. യുദ്ധവേളകളില്‍, ആധുനിക കാലത്തെപ്പോലെ ഡിസ്പെന്‍സറിയൊക്കെ ഒരുക്കി മുറിവേറ്റവരെ പരിചരിക്കാനുള്ള സന്നാഹം അവര്‍ ഒരുക്കിയിരുന്നു. സൈനബ്(റ) ചരിത്രത്തില്‍ അറിയപ്പെടുന്നത്, പാവങ്ങളുടെ അമ്മ എന്നര്‍ഥം വരുന്ന 'ഉമ്മുല്‍ മസാകീന്‍' എന്ന പേരിലാണ്.
ആധുനിക ലോകത്തും അത്തരം സേവനം ചെയ്യുന്നവര്‍ ധാരാളം ഉണ്ട്. അവരെ ലോകവും മാധ്യമങ്ങളും അവഗണിക്കുകയാണ്. ജനസേവനം ദൈവാരാധനയായിക്കാണുന്ന മതമാണ് ഇസ്ലാം. ജനങ്ങളിലൂടെയാണ് ദൈവത്തിലേക്കടുക്കുക. അങ്ങനെ പഠിപ്പിക്കപ്പെടുന്ന സ്ത്രീ ഇതിലൊന്നും പിന്നാക്കമാകാന്‍ പാടില്ല. എന്നാല്‍ പിന്നാക്കമാണെന്നത് യാഥാര്‍ഥ്യവുമാണ്. ചരിത്രം ഒരുപാട് സ്ത്രീകളെപ്പറ്റി പറയുന്നു. എഴുന്നൂറോളം സ്ത്രീകള്‍ ഹദീസ് റിപ്പോര്‍ട്ട് ചെയ്തിട്ടുണ്ട്. അവരെ സമൂഹം അംഗീകരിച്ചു. റസൂലിന്റെ വാക്കുകള്‍ അദ്ദേഹത്തില്‍ നിന്നും കേട്ട് സമൂഹത്തിന് പകര്‍ന്നു കൊടുക്കുകയാണ്. ഇത് ചില്ലറ കാര്യമല്ല. നബി അവരെ തടഞ്ഞില്ല. ആഇശ(റ)ക്ക് ഹദീസില്‍ മാത്രമല്ല വൈദ്യം, ഗണിതം എന്നിവയിലൊക്കെ നല്ല പ്രാഗത്ഭ്യം ഉണ്ടായിരുന്നു.
സമ്മേളനത്തില്‍ സമുദായത്തിനകത്തും പുറത്തുമുള്ള മറ്റു വനിതാസംഘടനകളുടെ പ്രാതിനിധ്യം ഉണ്ടാവുമോ?
ഇന്‍ശാ അല്ലാഹ്, എല്ലാവരും ഉണ്ടാകും. സമുദായത്തിലെ സ്ത്രീകളും ഇതര സ്ത്രീസംഘടനകളുമൊക്കെ നന്നായി സഹകരിക്കുന്നുണ്ട്. സ്ത്രീ പ്രശ്നങ്ങളില്‍ നമുക്കൊന്നിച്ച് പ്രവര്‍ത്തിക്കാം എന്ന് അവര്‍ പലപ്പോഴും പറയാറുള്ളതാണ്.
മുസ്ലിം ഐക്യം കാലഘട്ടത്തിന്റെ ആവശ്യമാണ്. ഈ സമ്മേളനം അതിനൊരു വേദിയാകുമോ?
മുസ്ലിംകള്‍ ഒന്നിച്ചുനില്‍ക്കേണ്ടത് കാലഘട്ടത്തിന്റെ ആവശ്യമാണ്. എല്ലാവരും ഒന്നിച്ച് ശ്രമിച്ചെങ്കിലേ സമുദായം രക്ഷപ്പെടൂ. അഭിപ്രായ വ്യത്യാസങ്ങള്‍ മാറ്റിവെക്കാന്‍ തയാറാകണം. മുസ്ലിം ഐക്യത്തിന് വനിതാ സമ്മേളനം നിമിത്തമാകുമെങ്കില്‍ അതൊരു ചരിത്ര നേട്ടം തന്നെയായിരിക്കും.
സ്ത്രീകള്‍ക്കാണ് ശരിക്കും സമൂഹത്തെ രക്ഷിക്കാനാവുക. കാരണം സ്ത്രീകളുടെ മടിത്തട്ടിലാണ് തലമുറ വളരുന്നത്. ഇറാന്‍ വിപ്ളവം വിജയിപ്പിച്ചത് സ്ത്രീകളാണെന്ന് ആയത്തുല്ലാ ഖുമൈനി പറയുകയുണ്ടായി. 'നിങ്ങള്‍ രംഗത്ത് വന്നാല്‍ ആരാണ് നിങ്ങളുടെ കൂടെയുണ്ടാവുക' എന്ന് അദ്ദേഹത്തോട് ചോദിച്ചപ്പോള്‍ 'അവര്‍ എന്റെ സഹോദരിമാരുടെ മടിത്തട്ടില്‍ വളര്‍ന്ന് വരുന്നുണ്ട്' എന്നാണ് അദ്ദേഹം മറുപടി പറഞ്ഞത്. അത് ശരിയായിരുന്നു എന്നതിന് ചരിത്രം സാക്ഷി. മദ്റസപോലും ഇല്ലാഞ്ഞിട്ടും തുര്‍ക്കിയില്‍ ഇസ്ലാം എങ്ങനെ ഉയിര്‍ത്തെഴുന്നേറ്റു എന്ന ചോദ്യത്തിന് അവിടത്തെ ഇസ്ലാമിക പ്രസ്ഥാന നായകന്‍ നജ്മുദ്ദീന്‍ അര്‍ബകാന്റെ മറുപടി, 'സ്ത്രീകള്‍ വിപ്ളാവേശം ഏറ്റുവാങ്ങി അത് തലമുറകള്‍ക്ക് പകര്‍ന്നു കൊടുത്തു' എന്നായിരുന്നു. അപ്പോള്‍ സ്ത്രീ വിചാരിച്ചാല്‍ ഏത് സമൂഹത്തെയും മാറ്റിയെടുക്കാന്‍ കഴിയും.
അവസരം കിട്ടിയിരുന്നെങ്കില്‍ സ്ത്രീകള്‍ കുറെക്കൂടി മുന്നേറുമായിരുന്നു എന്നു തോന്നുന്നുണ്ടോ?
നല്ലവണ്ണം പ്രസംഗിക്കാനും എഴുതാനും കഴിവുള്ള സ്ത്രീകള്‍ നമ്മുടെ ഇടയില്‍ ഉണ്ട്. ഇന്നും വൈജ്ഞാനിക രംഗത്ത് മുന്നേറുന്നത് പെണ്‍കുട്ടികളാണ്. പക്ഷേ ഇതൊന്നും പുറത്തേക്കെടുക്കാനോ വിവിധ മേഖലകളില്‍ മുന്നേറാനോ കഴിഞ്ഞിട്ടില്ല. സമ്മേളനം ഒരു പ്രത്യേക സമുദായത്തെ മുന്നില്‍ കണ്ടല്ല. മൊത്തം സ്ത്രീകളെ ഉയര്‍ത്തുക എന്നതാണ് സമ്മേളന ലക്ഷ്യം.
പ്രസ്ഥാനം സ്ത്രീകളെ പ്രോത്സാഹിപ്പിക്കുന്നുണ്ട് എന്നു പറഞ്ഞു. എന്നിട്ടും അത്തരം കുടുംബങ്ങളില്‍ നിന്ന് സ്ത്രീകള്‍ക്ക് ഉയര്‍ന്നുവരാന്‍ കഴിയുന്നില്ലല്ലോ?
സ്ത്രീകളെ സംബന്ധിച്ചേടത്തോളം കുടുംബത്തില്‍ പുരുഷന്മാരുടെ സപ്പോര്‍ട്ട് വളരെ അത്യാവശ്യമാണ്. ഒരു യോഗത്തിനോ മറ്റോ പോയാല്‍ അത് ഉള്‍ക്കൊള്ളാന്‍ പറ്റാത്ത കുടുംബമാണെങ്കില്‍ പ്രസ്ഥാനം എത്ര പ്രോത്സാഹിപ്പിച്ചിട്ടും കാര്യമില്ല.
സ്ത്രീ ശാക്തീകരണ ചര്‍ച്ച ഇസ്ലാമിക പ്രസ്ഥാനത്തില്‍ മാത്രം ഒതുങ്ങിപ്പോകുന്നില്ലേ?
ജമാഅത്തെ ഇസ്ലാമി ഇന്ത്യയിലെ ചെറിയൊരു സംഘടനയാണ്. അതുകൊണ്ട് തന്നെ ആശയങ്ങള്‍ സാധാരണ സ്ത്രീകളില്‍ എത്തിക്കാന്‍ വളരെ കാലം പിടിക്കും. അതേസമയം സംഘടനയുടെ എല്ലാ തലങ്ങളിലും വനിതാ പ്രാതിനിധ്യം ഉറപ്പ് വരുത്താന്‍ ജമാഅത്ത് തീരുമാനിച്ചിട്ടുണ്ട്. ഇതിനുവേണ്ടി സംഘടനയുടെ ഭരണഘടനയില്‍ ഭേദഗതികള്‍ വരെ വരുത്തി. ജമാഅത്തിന്റെ ഉന്നതാധികാര സമിതിയായ കേന്ദ്രപ്രതിനിധി സഭയില്‍ ഓരോ സംസ്ഥാനത്തെയും ജമാഅത്ത് വനിതാ അംഗങ്ങളുടെ എണ്ണം കണക്കിലെടുത്ത് സ്ത്രീ സംവരണം ഏര്‍പ്പെടുത്താനും നീക്കമുണ്ട്.
ഇതര സംസ്ഥാനങ്ങളില്‍ നിന്ന് ജമാഅത്തെ ഇസ്ലാമിയുടെ പ്രവര്‍ത്തനങ്ങള്‍ കേരളത്തില്‍ എങ്ങനെ വ്യത്യാസപ്പെട്ടിരിക്കുന്നു?
മറ്റു സംസ്ഥാനങ്ങളില്‍ സ്ത്രീ ശാക്തീകരണ പ്രവര്‍ത്തനങ്ങളില്‍ കേരളത്തിന്റെ അത്ര സജീവത ഇല്ല. കേരളത്തിലെ ഇസ്ലാമിക സ്ഥാപനങ്ങളൊക്കെയാണ് ഇതിന് കാരണം. സമൂഹത്തിലെ അധഃസ്ഥിതരായ സ്ത്രീകള്‍ അനുഭവിക്കുന്ന പീഡനങ്ങളില്‍ വേണ്ടത്ര മാധ്യമ ശ്രദ്ധ പതിയുന്നില്ല. മീഡിയാ ശ്രദ്ധ മുസ്ലീം സ്ത്രീയില്‍ മാത്രം ഒതുങ്ങുകയാണ്. അക്കാര്യം കൂടി ജനശ്രദ്ധയില്‍ കൊണ്ടുവരാന്‍ സമ്മേളനം ശ്രമിക്കും. ജാതീയമായ ഉച്ചനീചത്വങ്ങള്‍ ഒരുപാട് ഉണ്ട്. കേരളത്തിന് വെളിയില്‍ അവര്‍ ഒരുപാട് പീഡനങ്ങള്‍ അനുഭവിക്കുന്നു. അവരെ ഉയര്‍ത്തിക്കൊണ്ട് വരാന്‍ ഒരുപാട് ശ്രമങ്ങള്‍ നടത്തുന്നുണ്ട്. വിഷന്‍ 2016 ഒക്കെ അതിന്റെ ബാധകമാണ്.
ജമാഅത്ത് ശൂറയില്‍ സ്ത്രീകള്‍ക്കുവേണ്ടി സംസാരിക്കാറുണ്ടോ?
സ്ത്രീകള്‍ക്കു വേണ്ടി ശൂറയില്‍ പുരുഷന്മാരും സംസാരിക്കാറുണ്ട്. ജമാഅത്തില്‍ വനിതാ അംഗങ്ങള്‍ വളരെ കുറവാണ്. പുരുഷന്മാര്‍ വോട്ട് ചെയ്തില്ലെങ്കില്‍ ഞാന്‍ ശൂറയില്‍ എത്തുമായിരുന്നില്ല. ഇസ്ലാമിക വീക്ഷണം ഉയര്‍ത്തിപ്പിടിച്ച് തന്നെയാണ് ജമാഅത്തെ ഇസ്ലാമി സ്ത്രീകള്‍ക്ക് കടന്നുവരാന്‍ അവസരമൊരുക്കുന്നത്. ഇതിന്റെ പേരില്‍ കുറെ വിമര്‍ശനങ്ങള്‍ പ്രസ്ഥാനം നേരിടേണ്ടി വന്നിട്ടുണ്ട്. അതൊന്നും പ്രസ്ഥാനത്തെ തളര്‍ത്തുകയല്ല, വളര്‍ത്തുകയാണ് ചെയ്തത്. പ്രസ്ഥാനം ഇത്തരം വിമര്‍ശനങ്ങള്‍ക്കൊന്നും മറുപടി പറയാറില്ല. കൂടുതല്‍ ക്രിയാത്മകമായ രീതിയില്‍ ഇടപെടും. ആദ്യം ആക്ഷേപിച്ചവര്‍ തന്നെ പിന്നീട് പ്രസ്ഥാനത്തിന്റെ വഴി പിന്‍പറ്റുകയാണ് ചെയ്തിട്ടുള്ളത്.
ജമാഅത്തെ ഇസ്ലാമി സംസ്ഥാന സെക്രട്ടറി എന്ന നിലക്കുള്ള അനുഭവം?
അത് വെറും പദവി മാത്രമല്ല. നമ്മുടെ വാക്കുകള്‍ പ്രസ്ഥാനം എന്നും മുഖവിലക്കെടുത്തിട്ടുണ്ട്. പ്രവാചകന്റെയും ഖുലഫാഉര്‍റാശിദുകളുടെയും കാലത്ത് സ്ത്രീകളോടും കൂടിയാലോചിച്ചിരുന്നുവല്ലോ. അവരുടെ അഭിപ്രായം സ്വീകരിക്കുകയും ചെയ്തിരുന്നു. അതാണ് നമ്മുടെ മാതൃക. സ്ത്രീകള്‍ ഇനിയും ശൂറയില്‍ കടന്നുവരും; സ്ത്രീകള്‍ സ്വയമേവ കരുത്ത് തെളിയിക്കുകയാണെങ്കില്‍. കരുത്തുറ്റ ഒരു വനിതാനിര വളര്‍ന്നുവരുന്നുണ്ടെന്ന് തന്നെയാണ് വിശ്വാസം.
സര്‍ക്കാറിന്റെ വനിതാ സംവരണ നയത്തെ എങ്ങനെ കാണുന്നു?
സംവരണത്തെ ജമാഅത്തെ ഇസ്ലാമി വനിതാ വിഭാഗം സ്വാഗതം ചെയ്യുന്നുണ്ട്. അതേസമയം അത് അര്‍ഹരായവര്‍ക്ക് കിട്ടുന്നുവെന്ന് ഉറപ്പുവരുത്തണം. ഭരണഘടന ഭേദഗതി ചെയ്തും അര്‍ഹരായവര്‍ക്കെല്ലാം സംവരണം ഉറപ്പാക്കണം.
No comments:
Post a Comment